سي دي الأمس

ورقتين فلوسكاب لقيتهم
في الدرج القديم..
قريتهم..
لقيت الزمن تاب عن الزوغان
و انتظرني في لحظة من الصراحة..
و الفصاحة..
سرد ذكرياتي و عمري اللي مضى
و بصم ع الورقة و مضى
و اقر بالأجازة..
و صرح بالمغفرة..
شغل سي دي الأمس قدامي
و الأحلام بتتسرسب في المشاهد و المناظر
و الرؤيا بتحتاج لمجهود
مجهود في فك رموز الرواية
في فهم علامة..و اية
في نظرة في المراية
..
ف همسة جملة ليها معنى
مش كلمتين فارغين
زي بندقة فاضية
مافهاش المراد
بس بطرقع لما تتفتح فاضية..
قاللي:
يا ابني الأفتعال دخل بالأنسانية
لحد الفراغ و الصفر..
تخيل لما الميزان يتقلب..
تخيل لما صفر المنقلة يبقى مية و تمانين
تخيل لما السنين ترجع مارش دير..
فتسمع جوا نفسك..سؤال
عن الأختلاف
و يتطرح موضع القبول و الفهم..
تلاقي مفيش فايدة..
فتسكت.

؟

وحداني من تاني
..
و الدوشة وجداني

و ين العيون و القلب

و الأنسان
و العقل
و العنوان..

و يا هل ترى كل الكلام .. له معنى
ولا جايز
يسكت المعنى في الكلمة من كتر الفراغ
و من محدودية الأفق.

؟
سؤال

(Event-Conclusion)

لست وحدي من وصل لمرحلة الكونكلوجن في الحياة .. و تخطى مرحلة الأيفنت.انتهت الدهشة و بقيت المفاجأة.

كلام موجز

اعتقد ان اهم مشكلة في حياتي يمكنني تلخيصها في كلام موجز لو قلت ان مشكلتي هي ان انا رفضت حاجات كتير قبلتها و قبلت حاجات كتير رفضتها..و بس

what you have.

Doris Mortman:
Until you make peace with who you are, you'll never be content with what you have.

المتاهه

وجدته بجواري يتفحص مندهشا ملامح المكان من حولنا..قلت : لا مفر.. و لكنه لم يعرني اهتماما فكان يبحث عن شيء ما- يعرفه - في جدران تلك الردهه الطويلة..تركته خلفي و خطوت للأمام في محاولة كسب بعض الوقت للخروج من هذة الطرقات المتداخلة المحيرة..وصلت للمفترق الأول ..فكان على ان اختار من ثلاثة..اخترت..وصلت للمفترق الثاني..فكان على ان اختار من ثلاثة..اخترت..وصلت للمفترق الثالث..فكان على ان اختار من ثلاثة ايضا..و هنا اخترت ردهه اعادتني للبداية..وهنا ارتجفت فزعا ..وجدته و قد لقى حتفه اثر سقوطه من اعلى الجدار فقد حاول الهروب من المتاهه مبكرا..جلست جوار جسدة الممزق من خناجر الجدار و دماءه السائلة و كتبت هذة السطور ..و لا ادرى هل سأخرج سالما من هذة اللعبة ام ان نهايتي فيها؟.

شخوص - ( 3 ) الأسطى مزاج

نجار في الدقي مش من العواجيز..عنده دلوقتي بتاع خمسين سنه..وشه في ملامح من اخناتون..او تقدر تقول بمعنى اصح فيه ملامح من تمثال دماغ اخناتون..نفس الصلابة..بجانب بشرته السمراء و العروق النابضه في عنقه كل لما اشوفه و هو شغال باحس انه كان مراكبي (بيجدف) في مركب فرعونيه خارجة للصيد..الأسطه مزاج هو احمد محمد عبد العال من محافظة اسوان..بيعمل كل حاجة بالخشب..قدرته على وضع كل افكاره و احتياجاته الحياتية في كفه و امكانات حرفته و تقنياتها التكنولوجية البسيطة في كفة و يا للعجب..ما كل هذا الأتزان كرسي خشب دولاب خشب باب شباك عادي انماانسان من الخشب لأ

هو..الأسطى مزاج

شخوص- ( 2 ) الشمندي ابو الخير احمد

..سائق تاكسي في اسوان منذ عام 1945..ينهل على كل من يركب معه بحديث شيق عن ناس اسوان,معابدها,نيلها..مرشد سياحي بدون كليه اثار او ورقه كراسه 9 اسطر...يتكلم خمسه لغات منها النوبيه قطعا..سألته بعد ركوبي معه من امام فندق نيو ابو سمبل متجها لمعبد فيله:انت بتحب الأجانب يا عم شمندي؟
- رد بثقه:طبعا..دول قرايبنا.
- قرايبكو منين يا عم..ايش جاب الأنجليز لناس حتشبسوت؟
- ما انت مش عارف..احنا لسة داخلين الأسلام قريب
- قريب!..يعني امتى؟
- من ييجي 250 - 300 سنه..الأول كنا مسيحيين.
لم أستطع متابعه حوار منطقي بيننا لقناعتي بأختلاف نسبية القياس لدينا..استمر عم شمندي في سرد قصصه عن اسوان و فنادقها و المتحف الجديد و نادي اسوان و العيد السنوي للمحافظة و الهجرة و و وقاطعته متسائلا عن مدة الرحله لمعبد ابو سمبل
رد بثقة: دي قريبه هنا
- قد ايه يعني؟
-300
كيلو جنوب اسوان
- طيب.

شخوص - (1)عم محمد هتلر

الله يرحمه عاش لحد ما بقى عنده 88سنة وحيدولا ابن ولا زوجة ولا اخوات..كان ساكن في قوضه فوق سطوح احد العمارات الراقية بالدقي و لم يكن يعامل كأنه انسان من افراد الدقي لأنه كان بييجي الدقي ينام و يروح ورشته في المنيرة كل يوم الصبح..عمرك ما كنت تقدر تشوف عم محمد هتلر الا الصبح و هو مستني اتوبيس عشرين اما لحظة قدومه بالليل فعمر ما حد شافها.كان بيبقى شايل في ايده اليمين كيس بلاستيك دايب به اكل يومه و قرطاس سكر و قرطاس شاي و في ايده الشمال خسايه...وقفت معاه ايام كتير قبل رحيله السنه اللي فاتت..-انا حكاء غبي جدا..ازاي ما قولتلكوش لحد دلوقتي هو بيشتغل ايه؟-..عم محمد كان عنده ورشة صغيرة بيعمل فيها الرسومات اللي بتبقى على الملايات و المخدات بالخيط..عارفين انتو الرسومات التقليدية اللي بتبقى على المفارش و الستاير؟..كان بيعملها بمنتهى الحرفيه و لكن لم يكن لديه قضيته..عم محمد هتلر كان بيحب ايام الملك فاروق..و يقولك ان جمل عبد الناصر ولد ما جبتوش ولاده..و تحس انه هايبوس رجل السادات و هو بيحكى عنه و في الأخر يقولك انهاردة احسن من امبارح و بكرة احسن من انهاردة بكتيير..عم محمد هتلر قضى عمره يرسم ورد على الملايات و الستاير..يا لها من حياه بسيطه بلا الكثير من اعباء حياتي اليوم..لا اريد ان احيا مثله..و لكنى اتعجب لكونها مختزله في ذلك اللحن الموسيقى الرتيب

مأساة العقل